ត្រឡប់ក្រោយវិញ 
កាលពីព្រឹកថ្ងៃទី១៩ ខែមិថុនា ឆ្នាំ២០២០ ក្រុមហ៊ុន ប៉េង ហួត គ្រុប បាននាំយកថវិកាចំនួន ២០ម៉ឺនដុល្លារអាមេរិក ដែលក្នុងនោះថវិកាចំនួន ១០ម៉ឺនដុល្លារ សម្រាប់ឆ្នាំ២០១៩ និង១០ម៉ឺនដុល្លារទៀត សម្រាប់ឆ្នាំ២០២០ ដើម្បីប្រគល់ជូនដល់មូលនិធិគន្ធបុប្ផាកម្ពុជានៅទីស្ដីការក្រសួងសេដ្ឋកិច្ច និងហិរញ្ញវត្ថុ។
ក្នុងពិធីប្រគល់-ទទួលនេះ លោកបណ្ឌិត ចន ណារិទ្ធ អគ្គលេខាធិការក្រុមប្រឹក្សាជាតិគាំពារសង្គម និងជាប្រធានលេខាធិការដ្ឋានមូលនិធិគន្ធបុប្ផាកម្ពុជា និងជាតំណាងរបស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបរធនបាលនៃមូលនិធិគន្ធបុប្ផាកម្ពុជា បានថ្លែងអំណរគុណយ៉ាងជ្រាលជ្រៅជូន លោកស្រីអគ្គនាយិកា និងគណៈគ្រប់គ្រងក្រុមហ៊ុន ប៉េង ហ៊ួត គ្រុប ចំពោះទឹកចិត្តសប្បុរសធម៌ ក្នុងការបរិច្ចាគជាប្រចាំឆ្នាំ ជូនមូលនិធិគន្ធបុប្ផាកម្ពុជា ក្នុងគោលដៅរួមតែមួយគត់គឺដើម្បីរួមចំណែកជាមួយរាជរដ្ឋាភិបាល ក្នុងការរក្សានិរន្តរភាពនៃកិច្ចដំណើរការបស់មន្ទីរពេទ្យគន្ធបុប្ផា ក្នុងការសង្រ្គោះ និងលើកកម្ពស់សុខុមាលភាពរបស់ទារក និងកុមារនៅកម្ពុជា។
មូលនិធិគន្ធបុប្ផាកម្ពុជា ត្រូវបានបង្កើតឡើងក្នុងគោលបំណងបំផុស និងផ្សព្វផ្សាយចលនាមនុស្សធម៌ និងកៀរគរអំណោយឧបត្ថម្ភធន និងវិភាគទានសប្បុរសធម៌ ពីគ្រប់ប្រភពស្របច្បាប់នានា ដើម្បីទ្រទ្រង់ដល់ប្រតិបត្តិការរបស់មន្ទីរពេទ្យគន្ធបុប្ផា។ មន្ទីរពេទ្យគន្ធបុប្ផា គឺជាមន្ទីរពេទ្យកុមារដែលធំជាងគេនៅក្នុងព្រះរាជាណាចក្រកម្ពុជា ដែលបាននឹងកំពុងផ្តល់សេវាពិនិត្យ និងព្យាបាលកុមារចំនួនប្រមាណ ២០០០នាក់ ក្នុងមួយថ្ងៃៗដោយឥតគិតថ្លៃ ៕